Scroll to top
ТӨРИЙН ӨМЧИЙН ЕРӨНХИЙ БОЛОВСРОЛЫН СУРГУУЛЬД ЭДҮТЭН СУРГАЛТЫН ЦАХИМ СИСТЕМ НЭВТРҮҮЛЭХ ЗӨВЛӨМЖ
ТӨРИЙН ӨМЧИЙН ЕРӨНХИЙ БОЛОВСРОЛЫН СУРГУУЛЬД ЭДҮТЭН СУРГАЛТЫН ЦАХИМ СИСТЕМ НЭВТРҮҮЛЭХ ЗӨВЛӨМЖ
2024-2025 оны хичээлийн жилд ерөнхий боловсролын 678 сургуулийн бага боловсролын 10600 гаруй багш сургалтыг зохион байгуулж, 1-5 дугаар ангийн 342088 сурагч 7 хоногийн математикийн хичээлийн 1 цагийг Эдүтэн цахим систем дээр суралцаж, суралцагчид 2 тэрбум гаруй дасгал хийж гүйцэтгэсэн. Дунджаар нэг сурагч долоо хоногт платформ дээр 29 минут буюу өдөрт ойролцоогоор 4 минутыг зарцуулсан байна.
Эдүтэний хиймэл оюун ухаанд суурилсан дүн шинжилгээ
Сурагчдын гүйцэтгэлийн ахиц дэвшлийг хянахын тулд ашигладаг хэмжигдэхүүнүүд нь үйл ажиллагаа болон ур чадвар гэсэн хоёр ангилалд хуваагддаг. Бүх хэмжигдэхүүнүүд нь Эдүтэн платформыг ашиглаж буй сурагчдын дасгалын гүйцэтгэлийг хиймэл оюун ухаанаар автоматаар цуглуулдаг суралцахуйн дүн шинжилгээний мэдээлэлд суурилдаг. Үйл ажиллагааны хэмжигдэхүүнүүд нь багш нар суралцагчдадаа Эдүтэн дээр хичээллэхэд хэрхэн амжилттай тусалж байгааг хянахаас гадна боловсролын тогтолцоо улс орон даяар хэрхэн ажиллаж байгаа талаар сонирхолтой мэдээллийг харуулдаг. Үйл ажиллагааны статистик мэдээллийг цаг хугацааны хувьд, ангиудыг харьцуулан, Монгол Улсын 21 аймгийн газар зүйн байршлаар нь харуулдаг бол ур чадварын мэдээлэл нь сурагч бүрийн математикийн ур чадвараа хэрхэн сайжруулж байгааг харуулдаг.
Эдүтэн нь бүх ангийн түвшинд хамаарах 750 гаруй математикийн ялгаатай ур чадварыг суралцагчдын гүйцэтгэлээр хянадаг. Ур чадварын энэхүү бодит цагийн мэдээлэл болон зөвлөмжүүдийг багш нар шууд, хялбар хүлээн авах, ашиглах боломжтой бөгөөд энэ нь тухайн суралцагчид цаг алдалгүй дэмжлэг үзүүлэх, түүнд тохирсон зааварчилгаа өгөх боломжийг олгохоос гадна багш нарын даалгавар шалгах, тестлэхэд зарцуулах цагийг багасгах ач холбогдолтой.
Хамтын ажиллагаа ба ахиц дэвшил
Боловсролын ерөнхий газрын ажлын хэсэг 21 аймаг, нийслэлийн ерөнхий боловсролын нийт 257 сургуулийн цахим системийн хэрэгжилтэд мониторинг хийж, цахим орчин бүрдүүлэлт, арга зүйн зөвлөмжийн хэрэгжилтийг хангах, сургууль, багш, суралцагч, эцэг, эх, асран хамгаалагчдад тулгамдаж буй асуудлыг хэлэлцэж, дэмжлэг үзүүлэх ажлыг Боловсролын судалгааны үндэсний хүрээлэн, аймаг, нийслэлийн Боловсролын газар, Эдүтэн байгууллагын олон улсын зөвлөхүүдтэй хамтран зохион байгуулж хэрэгжилтийн сайн туршлагын сан бүрдүүлж, байгууллагын фэйж хуудас болон “Eduten mongolia группээр аймаг, дүүрэг бүрд түгээн ажилласан ба 2024-2025 оны хичээлийн жилээс дундаж тохирц 3 хувиар сайжирсан үр дүнтэй байна.
2025-2026 оны хичээлийн жилд Эдүтэн цахим системийг төрийн болон орон нутгийн өмчийн ерөнхий боловсролын нийт сургуулийн 1-6 дугаар ангид, сургуулийн сонголтоор 7-9 дүгээр ангид тус тус хэрэгжүүлнэ.
Сургалтын хөтөлбөрийн хэрэгжилтийг дэмжих “Эдүтэн” цахим системийг хэрэгжүүлэх 2000 гаруй математикийн багш, 700 гаруй удирдах ажилтны сургалтыг 2025 оны 08 дугаар сард танхим болон цахим хосолсон хэлбэрээр зохион байгуулна.
Эдүтэний шинэчлэл
Шинэ хичээлийн жилд монгол сурагчдад зориулсан цоо шинэ аппликейшныг нэвтрүүлнэ. Энэхүү шинэ интерфэйс нь хэрэглэгчийн платформ дээр ажиллах туршлагыг илүү сайжруулж, сүлжээгүй үед ч Эдүтэний дасгал дээр ажиллах боломжийг олгоно.
